Naxçıvan Muxtar Respublikası Səhiyyə Nazirinin birinci müavini, nazir vəzifələrini icra edən Samiq Sadıxov Naxçıvandan Türkiyənin Qazi Universitetinə təlimə göndərilən ilk tibb bacısı heyəti ilə görüş keçirib.

Aztibb.az-a Nazirlikdən verilən xəbərə görə, görüşdə Samiq Sadıxov qeyd edib ki, tibb bacıları səhiyyə sisteminin aparıcı qüvvələridirlər, onların öz üzərlərinə düşən vəzifəni layiqincə və peşəkar yerinə yetirməyi həm tibbi xidmətin keyfiyyətinə, həm də xəstə məmnuniyyətinə təsir edən vacib amildir.

Onun sözlərinə görə, tibb bacılarının peşəkarlığının artırılması üçün cari ildən etibarən Türkiyə Universitetlərinin xəstəxanaları ilə başlanan mübadilə proqramlarımız mərhələli şəkildə Naxçıvan səhiyyə sistemindəki bütün tibb bacılarını əhatə edəcəkdir: "İlk göndərilən heyət kimi sizin məsuliyyətiniz böyükdür. Orada ilk təəssüratı siz formalaşdıracaqsınız. İnanıram ki, hər biriniz yaradılan bu şəraitdən maksimum faydalanacaq, öz aktivliyiniz, təşəbbüskarlığınız, nizam-intizamınızla seçiləcək, bilik və bacarıqlarınızın artırılması üçün var qüvvənizlə çalışacaq, səhiyyəmizi yüksək səviyyədə təmsil edəcəksiniz".

Samiq Sadıxov diqqətə çatdırıb ki, mübadilə proqramları ikitərəflidir. Yaxın günlərdə Naxçıvanda Qazi Universitetindən gələn tibb bacıları burada profilləri üzrə müxtəlif xəstəxanalarda işə başlayacaqlar. Bununla da daha çox tibb bacısı iş prosesində təlimə cəlb olunacaq.

Görüşün sonunda “Orta orta tibb işçilərinin vəzifə və intizam təlimatları”na dair slayd nümayiş etdirilib.