Səlis Danışıq, Nitq və Psixologiya Akademiyasının Sumqayıt filialında bir qrup Qarabağ qazisi ilə görüş keçirilib.

Akademiyadan Aztibb.az-a verilən məlumata görə, görüşün məqsədi qazilərin problemləri ilə yaxından maraqlanmaq, onların ailə üzvlərinə və özlərinə lazım gəldiyi halda təmənnasız psixoloji və loqopedik xidmətlər göstərmək olub.

Əvvəlcə Səlis Danışıq Nitq Və Psixologiya Akademiyasının direktoru tanınmış loqoped-defektoloq Xavər Abdullayeva qazilərə Akademiyanın yeni istifadəyə verilmiş Sumqayıt filialı haqqında ətraflı məlumat verib. O, artıq 18 ildir fəaliyyət göstərən Akademiyada dövlətimizin apardığı siyasətə dəstək olaraq, hər zaman şəhid ailələri üzvlərinə, müharibə əlillərinə və müharibə iştirakçılarına xüsusi qayğı ilə yanaşıldığını bildirib. Direktor onlara təmənnasız xidmət göstərilməsi üçün müəssisədə hər bir şəraitin olduğunu qeyd edib.

Görüşdə iştirak edən qazilər göstərilən yüksək diqqət və qayğıya görə Azərbaycan Respublikasının Prezidenti cənab İlham Əliyevə və Birinci vitse-prezident Mehriban xanım Əliyevaya təşəkkür ediblər.