Uzun aradan sonra Yeni Klinikada ayrıca laboratoriya yaradılaraq Kistoz fibroza şübhəli pasiyentlər üçün "tər testi" aparılır.

 

Aztibb.az xəbər verir ki, bu barədə Kistik-Fibroz xəstələrinə Yardım İctimai Birliyinin sədri Səadət Bayramova sosial şəbəkədə məlumat paylaşıb.

 

Səadət Bayramova bildirib ki, laboratoriyada müayinə materiallarının əldə edilməsi üçün ətraf mühit və personalla təmasda olmayan tam steril vasitələrdən istifadə olunur, həmçinin burada laborator işlərinin təhlükəsizlik şəraitdə görülməsi üçün rahat şərait yaradılıb.

 

"Müayinələr laborant-həkim Təranə Əsədovanın iştirakı ilə aparılır. Kistoz fibroza şübhəli pasiyentlər Yeni Klinikaya müraciət edə bilərlər", - deyə məlumatda bildirilib.

 

Qeyd edək ki, Kistoz fibroz - irsi yolla keçən və metabolizm prosesinin pozulması nəticəsində yaranan xəstəlikdir. Həmin xəstəliyin körpənin həyatının ilkin dövründə müşahidə olunan əlamətlərinə yenidoğulmuşda uzun müddət davam edən sarılıq, düz bağırsağın sallanması, xroniki diareya, öskürək, təngnəfəslik, pnevmoniya, dəridən duzlu dad gəlməsi, fiziki inkişafın ləngiməsi və s. aiddir. Xəstəliyin məktəbəqədər, məktəb yaşlı uşaqlarda və yeniyetmələrdə simptomları fərqli olur.