Naxçıvan Muxtar Respublikası səhiyyə nazirinin birinci müavini, nazir vəzifələrini icra edən Samiq Sadıxov rayonlarda vətəndaş qəbulu qrafikinə uyğun olaraq bu gün Culfa Regional Tibb Mərkəzi Publik Hüquqi Şəxsin tabeliyində olan Ordubad rayon Mərkəzi Xəstəxanasında Ordubad rayon sakinlərini qəbul edib.
Aztibb.az-a Naxçıvan MR Səhiyyə Nazirliyindən bildirilib ki, qəbulda nazirliyin aidiyyəti struktur bölmələrinin rəhbərləri də iştirak ediblər.
Qəbulda 38 nəfər vətəndaşın müraciətinə baxılıb. Müayinə, müalicə, işlə təmin olunma və digər mövzuları əhatə edən müraciətlər diqqətlə dinlənilib və bir sıra məsələlər yerində həll olunub. Digər müraciətlərin araşdırılması və qanunvericiliyə uyğun baxılması məqsədilə aidiyyəti struktur bölmələrinin rəhbərlərinə müvafiq tapşırıqlar verilib.
