Mərkəzi Gömrük Hospitalının həkim-laborantı, t.f.ü.d. Səbinə İbrahimova Tibbi Laboratoriya şöbəsinin rəisi təyin olunub.

Hospitaldan Aztibb.az-a bildirilib ki, Səbinə İbrahimova 2020-ci ildən etibarən Mərkəzi Gömrük Hospitalında həkim-laborant kimi fəaliyyət göstərir.

O, Hospitalın molekulyar mikrobiologiya sahəsində Real Zaman PZR modifikasiya üsulu vasitəsilə kəmiyyət və keyfiyyət nəticələri verən diaqnostik testlərin həyata keçirilməsi, COVID-19-un diaqnostikası, hepatitlərin mürəkkəb genotiplərinin müəyyənləşdirilməsi, eləcə də hamiləliyin inkişafına təsir edən zooinfeksiyalardan toksoplazma, xlamidiya, sitomeqalovirus, herpes I və II, mikoplazma və bakteriya etiologiyalı digər infeksiyaların PZR analizin köməyi ilə təyin edilməsi ilə məşğuldur.

Səbinə İbrahimova 1997-ci ildə Bakı Dövlət Universitetinin tibbi biologiya fakültəsini bitirib. 2004-2017-ci illərdə müxtəlif dövlət və özəl tibb müəssisələrində həkim-mikrobioloq, 2017-2020-ci illərdə müxtəlif dövlət və özəl tibb müəssisələrində Molekulyar-biologiya laboratoriyasının müdiri kimi çalışıb. O, 2016-ci ildə Azərbaycan Respublikası Səhiyyə Nazirliyinin “Səhiyyə əlaçısı” adına, 2021-ci ildə Azərbaycan Respublikası Dövlət Gömrük Tibbi Xidmət İdarəsinin Mərkəzi Hospitalının Laboratoriya şöbəsinin xidmətdə əldə etdiyi müvəffəqiyyət, qüsursuz xidmət və digər nailiyyətlərinə görə Fəxri fərmana layiq görülüb.