“Arpaçay Karate Klubu” və Azərbaycan Qan Donorluğunun İnkişafı Mərkəzinin birgə təşkilatçılığı, İnclusive Organization Team və Mərkəzi Qan Bankının tərəfdaşlığı, həmçinin Bakı İdman Sarayının dəstəyi ilə şəhidlərimizin əziz xatirəsinə həsr olunmuş “Sağlam olaq - Donor olaq!” şüarı altında qanvermə aksiyası təşkil olunacaq.

Aztibb.az-a Azərbaycan Qan Donorluğunun İnkişafı Mərkəzinin mətbuat xidmətindən verilən məlumata əsasən, qanvermə aksiyası 20.01.2024-ci il tarixində, saat 10:00-dan 16:00-dək Bakı İdman Sarayında keçiriləcək.

"Hemofiliya və talassemiyadan əziyyət çəkən uşaqlara qayğı" Dövlət Proqramına uyğun olaraq, həmçinin Heydər Əliyev Fondunun "Talassemiyasız həyat naminə" proqramı çərçivəsində təşkil edilən aksiyada toplanan qan ehtiyatı talassemiya, hemofiliya, eləcə də leykoz (Qan xərçəngi) xəstəliyindən əziyyət çəkən xəstələr üçün istifadə olunacaq.

Qeyd edək ki, həmin tarixdə Bakı İdman Sarayında Arpaçay Karate klubunun təşkilatçılığı, Gənclər və İdman Nazirliyi və Azərbaycan Karate Federasiyasının birgə dəstəyi ilə “ARPAÇAY OPEN” karate turniri də keçiriləcək.

Şəhidlərimizin əziz xatirəsinə həsr olunmuş turnirin rəsmi açılış mərasimi 20 yanvar, saat 16:00-da baş tutacaq.

Giriş sərbəstdir!