Ümumdünya Səhiyyə Təşkilatının (ÜST) baş direktoru Tedros Adhanom Qebreyesus sosial media platformasında verdiyi açıqlamada "Qəzzada qırğına son qoyulmalıdır!" - ifadəsini işlədib.
Aztibb.az-ın medimagazin.com.tr-yə istinadla xəbərinə görə, Qebreyesus 600-dən çox xəstə və əksər tibb işçisinin xəstəxananı tərk etməli olduğunu bildirib.
Baş direktor ÜST və Birləşmiş Millətlər Təşkilatının Humanitar Koordinasiya Ofisi (UNOCHA) rəsmilərinin Əl-Əqsa Şəhidləri Xəstəxanasını ziyarət etdiklərini və çoxlu sayda yaralının təcili müalicə üçün gətirildiyinin şahidi olduqlarını qeyd edib.
Xəstəxananın Qəzzanın mərkəzi bölgəsindəki ən əhəmiyyətli sağlamlıq müəssisəsi olduğuna diqqət çəkən Qebreyesus xəstəxananın funksionallığına zərər vurmağın "mənəvi və tibbi rüsvayçılıq" olacağını vurğulayıb.
