Sərhədsiz Həkimlər Təşkilatı (MSF) Qəzza zolağının cənubundakı Xan Yunisdəki sığınacağa artilleriya mərmisinin düşməsi nəticəsində 4 nəfərin yaralandığını bildirib.
Bu barədə Aztibb.az medimagazin.com.tr-yə istinadla xəbər verir.
MSF-dən verilən yazılı açıqlamada bu gün səhər saatlarında qurumun əməkdaşları və ailələrinin yerləşdiyi Xan Yunusdakı sığınacaq divarına top gülləsinin dəydiyi qeyd olunub. Hücum nəticəsində biri 5 yaşlı qız olmaqla 4 nəfərin yaralandığı, MSF əməkdaşları ilə ailələrinin başqa yerə köçürüldüyü bildirilib.
Açıqlamada hücumun kim tərəfindən həyata keçirildiyi ilə bağlı heç bir qiymətləndirmə aparılmasa da, MSF-nin daha əvvəl İsrail qüvvələrinə sözügedən evin sığınacaq olduğu barədə məlumat verdiyi qeyd edilib.
Həmçinin açıqlamada hücumdan əvvəl heç bir evakuasiya təlimatı alınmadığı vurğulanaraq, “Qəzzada heç kimin və heç bir yerin təhlükəsiz olmadığını bir daha göstərən bu son hücumu qınayırıq” ifadələri işlədilib.
