Samsunda 3 santimetr uzunluğunda olmalı aorta damarının 11 santimetrə qədər genişlənərək partladığı üçün huşsuz şəkildə xəstəxanaya yerləşdirilən 82 yaşlı Cemal Barlak eyni vaxtda angioqrafiya və əməliyyatla sağlamlığına qovuşub.
Aztibb.az-ın medimagazin.com.tr-yə istinadla xəbərinə görə, Cemal Barlak 3 həftə əvvəl xəstələnərək yaxınları tərəfindən huşsuz vəziyyətdə Samsun Universiteti Tibb Fakültəsi Samsun Təhsil və Araşdırma Xəstəxanasına aparılıb.
Müayinələr zamanı 3 santimetr olması lazım olan aorta damarının 11 santimetrə qədər genişlənərək partladığı müəyyən edilib. Ürək-damar Cərrahiyyəsi şöbəsinin həkimi Emrah Ereren və professor İlker Hasan Karalın apardığı əməliyyatla xəstə eyni anda həm angioqrafiya, həm də cərrahiyyə əməliyyatı keçirib.
Professor İlker Hasan Karal ölüm riski yüksək olan xəstələrdə belə əməliyyatların edildiyini vurğulayaraq deyib:
"Əvvəllər açıq əməliyyatlar edirdik və ölüm halları yüksək idi. Angioqrafiya şöbəsində həyata keçirdiyimiz qapalı üsul texnikası ilə son illərdə xəstələrdə ölüm riski xeyli azalıb. Xəstəmizi təcili vəziyyətdən əməliyyata apardıq. Reanimasiya şöbəsindən yeni çıxan pasiyentimizi tezliklə evə buraxacağıq”.