Qaraciyərin degenerativ zədələnməsinə səbəb olan alkoqol əksər hallarda sirrotik dəyişikliklər törədir.

Aztibb.az xəbər verir ki, Diaqnoz Tibb Mərkəzinin baş həkimin müalicə işləri üzrə müavini, terapevt-hepatoloq Tofiq Əkbərov bildirib ki, qaraciyərin alkoqol zədələnməsi dedikdə qəbul edilən spirtli içkinin növü deyil, sutkalıq etanolun miqdarı vacibdir. Məs: 10 ml etanol, 25 ml-araqda; 100ml-şərabda; 200 ml-pivədə və sair aşkarlanır. Qaraciyər üçün sutkalıq 160 q etanol belə çox təhlükəlidir. Xüsusilə daimi və periodik olaraq spirtli içki qəbul edən insanlarda qaraciyərin alkoqol piy distrofiyası, steatohepatit və nəhayət sirroz müşahidə edilir.

Onun sözlərinə görə, alkoqol mənşəli qaraciyər sirrozu bəzən latent gedişli olması ilə pasiyenti aldadır. Belə ki, sadəcə oynaq ağrısı, baş ağrı, yaddaş pozulması, tez yorulma, periferik qan dövranı pozulması, əsəbilik, yuxu pozğunluqu kimi simptomların məhz içdiyi hər udum spirtli içki ilə zədələdiyi qaraciyərin “harayı” olduğunu insan anlamır ya da etiraf etmək istəmir və orqanizmdə ən vacib məqamda onun üçün həyatı mühüm funksiyalar yerinə yetirən qaraciyər tədricən məhv olur.