Quba Rayon Mərkəzi Xəstəxanasında 2023-cü il üzrə əmək fəaliyyətinə xitam verilən həkim və orta tibb işçiləri ilə görüş keçirilib.

Bu məlumat Aztibb.az-a Xəstəxanadan verilib.

Öncə xəstəxananın ərazisində Azərbaycanın ərazi bütövlüyü uğrunda canlarından keçmiş şəhidlərin xatirəsinə yaradılan abidə kompleksi ziyarət olunaraq üzərinə gül dəstələri qoyulub.

Daha sonra tədbir Quba Rayon Mərkəzi Xəstəxanasının akt zalında davam edib.

Tədbiri giriş sözü ilə açan müəssisə direktoru Əliyar Sərvərov qarşıdan gələn 31 dekabr Dünya Azərbaycanlılarının Həmrəyliyi Günü və Yeni il bayramı münasibəti ilə əməkdaşları təbrik edib. O, 65 yaşı tamam olaraq fəaliyyətinə xitam verilən həkimlərin və orta tibb işçilərinin əmək fəaliyyətləri, Quba rayon səhiyyəsinə verdikləri töhfələr və əməkləri yüksək qiymətləndirərək hər birinə gələcək həyatlarında uğurlar arzulayıb.

Son olaraq xəstəxana rəhbərliyi adından təqaüdə çıxan həkimlərə və orta tibb işçilərinə təltifnamə və qiymətli hədiyyələr təqdim olunub.