Naxçıvan Muxtar Respublikası səhiyyə nazirinin birinci müavini, nazir vəzifələrinin icra edən Samiq Sadıxov təcrübə mübadiləsi proqramında iştirak edəcək tibb işçilərinin seçilməsi üzrə Komissiyanın yaradılması məqsədilə müvafiq əmr imzayıb.
Aztibb.az-a Naxçıvan Səhiyyə Nazirliyindən bildirilib ki, əmrə əsasən ölkədaxili və xaricində fəaliyyət göstərən tibb müəssisələrində təcrübə mübadiləsi proqramında iştirak etməsi nəzərdə tutulan tibb işçilərinin ixtisas üzrə bilik və bacarıqlarının, peşə hazırlığı səviyyəsinin və müəssisədaxili etik davranış qaydalarının qiymətləndirilməsi və seçilməsi məqsədilə komissiya tərəfindən qiymətləndirmələr aparılması tapşırılıb. Komissiya tərəfindən yanvar ayında Türkiyənin Qazi Universiteti ilə aparılacaq təcrübə mübadilə proqramının ilk mərhələsində iştirak edəcək heyətin seçim mərhələsi lazımi işlərə başlanılıb.
Mübadilə proqramının ilk mərhələsində tibb müəssisələrinin baş və böyük tibb bacıları iştirak edəcək. 6 həftə davam edəcək proqramda iştirakçılar işlədikləri müvafiq sahələr üzrə Qazi Xəstəxanasında təcrübə və biliklərini artıracaqlar. Eyni zamanda, həmin müddətdə Qazi Universitetinin də tibb bacıları Naxçıvanda müvafiq xəstəxanalarda öz bilik və təcrübələrini yerli personalla bölüşəcək.
