Aztibb.az-a Xəstəxanadan verilən xəbərə görə, müəssisədə fəaliyyət göstərən tibb və qeyri-tibb personalının iştirakı ilə baş tutan görüşdə, çalışdıqları müddət ərzində vəzifə öhdəliklərini yerinə yetirdiyinə və əmək funksiyalarının icrasında fərqləndiyinə görə bir sıra tibb və qeyr-tibb işçilər təltif edilib.

 

Qobustan Rayon Mərkəzi Xəstəxanasının direktoru İmran Qurbanov əvvəlcə xəstəxana əməkdaşlarını Dünya Azərbaycanlılarının Həmrəyliyi Günü və Yeni il münasibəti ilə təbrik edərək onlara işlərində müvəffəqiyyətlər arzulayıb.

O, daha sonra xəstəxanaya yeni təyin olunan həkimləri kollektivə təqdim edib. Hər bir əməkdaşın əzmi sayəsində qısa müddət ərzində böyük uğurların əldə olunduğunu deyən direktor növbəti ildə tibb müəssisənin daha mühüm nailiyyətlərə imza atacağına inandığını söyləyib.

 

İmran Qurbanov qızılçaya qarşı aparılan mübarizənin və Vətən müharibəsi dövründə vəzifə öhdəliklərini yerinə yetirən həkim və tibb işçilərinin gördükləri işlərin danılmaz bir fakt olduğunu vurğulayıb.

 

“Onlar mürəkkəb şəraitdə gərgin əmək sərf edərək sutka ərzində demək olar ki, fasiləsiz çalışırdılar. Peşəkar həkimlərimizin səyi nəticəsində neçə-neçə döyüşçünün həyatı xilas edildi. İstər ön cəbhədə, istər arxa cəbhədə savaşan hər kəsin bizim qələbəmizdə xüsusi rolu var”, – deyə İmran Qurbanov qeyd edib.

 

Sonda Səhiyyə İşçiləri Həmkərlar İttifaqı şurasının sədri Zərbalıyeva Kəmalə tərəfindən xəstəxana əməkdaşlarına bayram sovqatları təqdim edilib.