ABŞ-ın Kaliforniya əyalətində 18 uşaq ətraf mühitin çirklənməsinin qarşısını almadığı səbəbiylə əyalətə qarşı iddia qaldırıb.

Aztibb.az “TRT Haber”ə istinadən xəbər verir ki, “Our Children's Trust” qeyri-kommersiya hüquqi təşkilatının dekabr ayında 8-17 yaş arası uşaqlar adına açdığı iddiada, ABŞ Ətraf Mühitin Mühafizəsi Agentliyinin (EPA) “ictimaiyyətin həyatını təhdid edən ətraf mühitin çirklənməsinə qəsdən icazə verdiyi” irəli sürülüb.

İddiaçılar EPA-nın uşaqlara qarşı ayrı-seçkilik etdiyini, onlara məhəl qoymadığını, onların bərabər yaşamaq və müdafiə olunmaq üçün konstitusiya hüquqlarını pozduğunu iddia ediblər.

“Our Children's Trust” təşkilatının hüquqşünası Julia Olson ictimaiyyəti ətraf mühitin çirklənməsindən qorumaq EPA-nın əsas vəzifəsi olduğunu vurğulayaraq, federal qurumun buna nail ola bilmədiyi üçün qanun qarşısında cavab verməli olduğunu bildirib.

EPA prezidenti Maykl Reqanın ətraf mühitin çirklənməsinə qarşı addım atmamaqla üzərinə düşən vəzifələri yerinə yetirmədiyi də iddia edilib.

İddiada EPA-nın 1970-ci ildə qurulduğu gündən bu yana ABŞ-ın dünyada ən çox istixana qazı buraxan ölkələrdən birinə çevrilməsinə göz yumduğu məsələsi yer alır.

“Biz daim gələcəklə bağlı narahatıq”

CNN iddiaçılardan sitat gətirib: "Biz daim gələcək üçün narahat oluruq. Ətrafımızda heç kim kifayət qədər sürətlə hərəkət etmir. Konstitusiya hər bir amerikalıya yaşamaq, azadlıq və xoşbəxtlik axtarışı hüquqlarını təmin edir və bura uşaqlar da daxildir".

EPA sözçüsü isə qanuni proseslə bağlı şərh verə bilməyəcəklərini deyib.