Azərbaycan Tibb Universiteti (ATU) I Müalicə-profilaktika fakültəsinin 3-cü kurs tələbələri bu gün Ailə təbabəti kafedrasında “Klinik maliyyə bacarıqları” fənnindən imtahan veriblər. Universitetin rektoru, professor Gəray Gəraybəyli imtahanın gedişini izləyib.

ATU-dan Aztibb.az-a bildirilib ki, ilk dəfə olaraq, OSKİ proqramı ilə tələbələr manikenlərin üzərində müayinələr həyata keçirib. Bu barədə adıçəkilən kafedranın müdiri, professor İbrahim İsayev məlumat verib. O bildirib ki, tələbələrin bu fənnə böyük marağı var, həvəslə öyrənirlər: “Hər qrup iki dəfə gəlməklə, təşkil etdiyimiz treninqlərdə iştirak edib. 3-cü dəfə isə imtahan verdilər. 3-cü kursda qiymətləndirmə 100 balla hesablanır. 10 bal sərbəst işlərə, 10 bal davamiyyətə, 80 bal isə klinik müayinənin aparılmasına görə verilir”.

ATU-nun rektoru tədris olunan fənn, eləcə də imtahan prosesi və yaradılmış şəraitlə bağlı tələbələrlə söhbətləşib, onların fikirlərini öyrənib. Tələbələr treninqlərdən və imtahan prosesindən razı qaldıqlarını bildirib, bəzi təkliflərlə çıxış ediblər.