Mədəaltı vəzin iltihabı zamanı ağrılar anidən, yaxud zamanla başlaya bilər. Ani başlayan ağrılara kəskin pankreatit zamanı, yəni mədəaltı vəzin kəskin iltihabında rast gəlinir. Bu xəstəliyin başlıca səbəblərinə öd kisəsi, daşı və öd axarlarının tutulması aiddir.

 

Aztibb.az xəbər verir ki, bu barədə Kliniki Tibbi Mərkəzin həkim-radioloqu Şəbnəm Topbaştekin bildirib.

 

Həkimin sözlərinə görə, qarının üst tərəfində ağrı, ağrının getdikcə kürək, bel bölgəsinə yayılması, hər yemək qəbulundan sonra ağrının artması, qızdırma, nəbzin sürətlənməsi, ürəkbulanma və qusma, qarına toxunduqda həssaslığın artması kimi hallar müşahidə olunur.

 

Şəbnəm Topbaştekin qeyd edib ki, təkrar olunan iltihablanmalar xroniki pankreatit xəstəliyinə yol açır ki, bu zaman da mədəaltı vəzdə geri dönməyən dəyişikliklər əmələ gələ bilir.

Xroniki pankreatitin əlamətlərinə arıqlama, getdikcə ağrıkəsicilərlə yüngülləşməyən ağrılar, qarında şişkinlik və köp, ishal və s. aiddir: "Diaqnozu ultrasəs müayinəsi və maqnit rezonans tomoqrafiyası, komputer tomoqrafiyası ilə qoyulur. Müalicəsi isə xəstəliyi yaradan səbəbə görə dəyişir. Həm cərrahi, həm də dərman müalicəsindən istifadə oluna bilər".