Naxçıvan şəhərində Ulu Öndər Heydər Əliyevin 100 illiyinə həsr olunmuş II Regional Neyroreabilitasiya Konfransı keçirilib.

Tədbir Azərbaycan Respublikası Səhiyyə Nazirliyi, Naxçıvan Muxtar Respublikası Səhiyyə Nazirliyi, Azərbaycan Tibb Universitetinin dəstəyi və Səhiyyə Nazirliyi Elmi- Tədqiqat Tibbi Bərpa İnstitutunun təşkilatçılığı ilə baş tutub.

Bu barədə Aztibb.az-a Səhiyyə Nazirliyindən məlumat verilib.

Öncə Ulu Öndər Heydər Əliyevin büstü üzərinə gül dəstələri qoyulub, Heydər Əliyev irsini əks etdirən muzey ziyarət olunub.

Dövlət Himninin səsləndirilməsi ilə başlayam konfransda əvvəlcə Ulu Öndər Heydər Əliyevin xatirəsi 1 dəqiqəlik sükutla yad edilib. Sonra Ulu Öndərin həyat və yaradıcılığına həsr olunmuş videoçarx izlənilib.

Konfransda Səhiyyə Nazirliyinin rəsmi nümayəndələri - Tibb xidmətləri şöbəsinin müdir müavini Təranə Xəlilova, Kurortologiya və reabilitasiya üzrə kurator Nigar Nəzərli, Naxçıvan Muxtar Respublikası səhiyyə naziri Samiq Sadıxov, Azərbaycan Tibb Universitetinin Nevrologiya kafedrasının rəhbəri prof. Aytən Məmmədbəyli iştirak ediblər.

N.Nəzərli rəsmi açılışda konfrans iştirakçılarını salamlayaraq, son zamanlar diqqətdə olan kurortologiya və reabilitasiyanın təşkili ilə bağlı fikirlərini bölüşüb.

Səhiyyə Nazirliyi Elmi-Tədqiqat Tibbi Bərpa İnstitutunun direktoru prof. Sədaqət Hüseynova konfransın mahiyyəti haqqında məlumat verib. Daha sonra o, "İnsultlu xəstələrin reabilitasiyasına müasir yanaşmalar" mövzusunda məruzə ilə çıxış edib.

Tədbirin məqsədi işemik insult və onun reabilitasiyasında istifadə olunan müasir üsullar, bu sahədə olan elmi – praktik yeniliklərin həkimlərə çatdırılmasından ibarət olub. Problemin müxtəlif sahələrinə həsr edilən məruzələr təqdim olunub.

Konfransa nevroloq, reabilitoloq, fizioterapevtlər, ailə həkimləri, orta tibb işçiləri də qatılıblar. İştirakçılar sertifikatlar, davamlı tibbi təhsil (DTT) kredit balları ilə təltif olunublar.