TƏBİB əməkdaşları “EIDOS” MMC-nin dəvəti ilə Kazan şəhərində işgüzar səfərdə olublar.
Aztibb.az-a TƏBİB-dən bildirilib ki, səfərdə Davamlı tibbi təhsil şöbəsinin müdiri Emil İskəndərov, Korporativ əməkdaşlıq şöbəsinin böyük məsləhətçisi Aysel Məhərrəmova və Layihələrin idarəolunması şöbəsinin böyük məsləhətçisi Firad Rəsulov iştirak ediblər.
Səfərin əsas məqsədi “EIDOS” MMC-nin istehsalat bazası ilə tanışlıq, tibbi təlimlər üçün hazır məhsulları – mulyajlar, manikenlər, simulyatorlar, praktiki əl vərdişlərinin təkmilləşdirilməsi üçün trenajorlar və digər avadanlıqlar ilə tanışlıq olub.
Səfər çərçivəsində TƏBİB heyəti “EIDOS” MMC-nin istehsal prosesi ilə tanış olub. Bununla yanaşı, tibbi təlimlər üçün avadanlıqların istismarı, proqram təminatı, texniki dəstəyi haqda məlumatlar dinlənilib.
Eyni zamanda, Kazan Federal Universitetinin Fundamental Təbabət və Biologiya İnstitutunun nəzdində fəaliyyət göstərən Simulyasiya Mərkəzinə baxış keçirilib. Tatarıstan Respublika Xəstəxanasının nəzdində yaradılan Müasir Tibbi Texnologiyalar Təlim və Tədris Mərkəzi ziyarət edilib.
Nümayəndə heyəti Mərkəzdə həkimlər üçün diplomdan sonrakı davamlı tibbi təhsil tədbirlərinin keçirilməsi məqsədilə 6 müxtəlif istiqamətlərdə canlı və 2 virtual treyninq laboratoriyalarının fəaliyyəti ilə tanış olub. “EIDOS”un istehsal etdiyi təlim avadanlıqlarının istifadəsinə dair məruzələr dinlənilib.
