Aztibb.az-a Mərkəzi Gömrük Hospitalından verilən xəbərə görə, 14 noyabr 2023-cü il tarixində konqres "Cumhuriyyətin 100-cü ilində keçmişdən gələcəyə ictimai səhiyyə" devizi altında rəsmi açılış hissəsi ilə öz işinə başlayıb. Türkiyə, Azərbaycan, London, Avstraliya, Serbiya, İndoneziya, Kolumbiya, Roma və digər ölkələrdən olan yüksəkixtisaslı ictimai səhiyyə mütəxəssislərinin iştirak etdiyi tədbirin rəsmi hissəsində Türkiyənin Ulu öndəri Atatürkün xatirəsi dərin hörmətlə anılıb və Türkiyə Cümhuriyyətinin Dövlət Himni səsləndirilib.

 

Rəsmi hissədən sonra konqresin elmi rəhbəri, Tükiyənin Dokuz Eylül Universitetinin Tibb fakültəsinin professoru, Türkiyənin İctimai Səhiyyə Uzmanları Dərnəyinin rəhbəri Bülent Kılıçın moderatorluğu ilə elmi hissəyə start verilib.

 

4 gün davam etmiş tədbir zamanı ictimai səhiyyənin aktual mövzularına - səhiyyə siyasəti, reproduktiv sağlamlıq, cəmiyyətdə psixoloji sağlamlıq xidmətlərinin təşkili, fövqəladə hallarda səhiyyənin təşkili, peyvəndləmə işinin əhəmiyyəti, ictimai səhiyyədə innovativ texnologiyaların tətbiqi, ətraf mühit sağlamlığı, qızılca ilə mübarizə, yoluxucu xəstəliklərin idarə edilməsi, uşaq və yeniyetmə sağlamlığı və digər aktual mövzulara dair 26 paneldə ümumilikdə 80-dən çox təqdimat edilib.

 

Tədbirdə panel müzakirələr və sual-cavab sessiyaları təşkil edilib, ekspertlərarası məlumat və təcrübə mübadiləsi həyata keçirilib, qarşılıqlı əməkdaşlıq imkanları üçün şərait yaradılıb.