Mərkəzi Gömrük Hospitalının 15 illik yubileyinə həsr edilmiş “Ulu Öndər Heydər Əliyev - 100 il” mövzusunda uşaqlar arasında şeir müsabiqəsi keçirilib.

Bu məlumat Aztibb.az-a Hospitaldan verilib.

Əvvəlcə “Ulu Öndər Heydər Əliyev və uşaqlar” mövzusunda videoçarx nümayiş olunub.

Tədbirin rəsmi hissəsində Azərbaycan Respublikası Dövlət Gömrük Komitəsi Mətbuat və İctimaiyyətlə Əlaqələr İdarəsinin rəisi Natiq Axundov və Dövlət Gömrük Komitəsi Tibbi Xidmət İdarəsinin rəis müavini, t.ü.f.d., dosent İsmayıl Əfəndiyev çıxış edərək Ümummilli Lider Heydər Əliyevin uşaqlara göstərdiyi diqqət və qayğıdan, ölkəmizdə uşaqların hərtərəfli inkişafının təmin edilməsi istiqamətində görülən işlərdən danışıblar.

Qeyd olunub ki, Azərbaycanda uşaqların sağlam, firavan böyüməsi, onların hüquqlarının yüksək səviyyədə qorunmasına xidmət edən dövlət siyasətinin əsası Ulu Öndər Heydər Əliyev tərəfindən qoyulub, hazırda Azərbaycan Respublikasının Prezidenti İlham Əliyev və Birinci vitse-prezident Mehriban Əliyeva tərəfindən davam etdirilir, bu istiqamətdə daim genişmiqyaslı işlər görülür.

Daha sonra Mərkəzi Gömrük Hospitalının əməkdaşlarının uşaqları Ümummilli Lider Heydər Əliyevə həsr olunmuş şeirlər söyləyiblər.

Münsiflər heyəti tərəfindən seçilən birinci, ikinci və üçüncü yerlərin qaliblərinə Libraff mağazalar şəbəkəsindən hədiyyə kuponları və təltifnamələr təqdim edilib.