Dünyada həkimlik qədər şəfalı, şəfqətli, xeyirxah və humanist peşə yoxdur. Bütün zamanlarda, xalqlar arasında həkim cəmiyyətin ən çox sevilən və hörmət edilən təbəqəsi sayılıb, onların haqqında hikmətli sözlər yazılıb. Seçdiyi peşəsindən, mövqeyindən asılı olmayaraq, hər kəsin qəlbində bu sənət sahiblərinə qarşı ali hisslər yaşayır.
Aztibb.az-ın "Həkimlərimizi tanıyaq!" rubrikasında Neftçala Rayon Mərkəzi Xəstəxanasının həkim-onkoloqu Könül Qafarovadan bəhs edəcəyik.
O, 1979-cu il mayın 1-də Neftçala şəhərində anadan olub. 1996-2002-ci illərdə Azərbaycan Tibb Universitetinin I Müalicə-profilaktika fakültəsində təhsil alıb. 2002-2003-cü illərdə Milli Onkologiya Mərkəzində internatura keçib.
Könül Qafarova 2003-cü il avqustun 1-dən Neftçala RMX-nın Poliklinika şöbəsində həkim-onkoloq, 2003-2012-ci illərdə isə Cərrahiyyə şöbəsində cərrah-assistent kimi fəaliyyət göstərib. Həkim-onkoloq olmaqla yanaşı, 2017-2020-ci il tarixlərində Hemodializ şöbəsində çalışıb. 2020-2021-ci illərdə Hemodializ şöbəsində müdir əvəzləyicisi vəzifəsində işləyib. 2022-ci ildən Neftçala Rayon Mərkəzi Xəstəxanası Sığortanın Təşkili və İnnovasiya şöbəsinin müdiri, həm də həkim-onkoloq kimi fəaliyyət göstərir.
