TƏBİB tabeliyində fəaliyyət göstərən Yeni Klinikada “Diabet və ağırlaşmaları” adlı konfrans keçirilib.

 

Klinikadan Aztibb.az-a verilən məlumata görə, konfransda müəssisənin direktoru Barat Yusubov “Azərbaycan Endokrinoloqlar Cəmiyyəti”nin qeydiyyatdan keçdiyini elan edərək cəmiyyətin sədri Xəyyam Eyvazovu həkimlərə təqdim edib.

 

Diabetdən əziyyət çəkən insanların sayının sürətlə artdığını deyən direktor şəkərli diabet xəstələrinin sayının 2030-cu ilə qədər 643 milyon, 2045-ci ildə isə 783 milyona qədər artacağının ehtimal olunduğunu bildirib.

 

Barat Yusubov ölkəmizdə də diabet xəstələrinin sayının son 10 ildə 3 dəfə artdığını bildirərək, hazırda rəsmi qeydiyyatdan keçən şəxslərin 300 mini keçdiyini qeyd edib.

 

Daha sonra direktor “Diabet və ağırlaşmaları” kimi konfransların bu xəstəliyə multidisiplinar yanaşmanın təmin edilməsində mühüm rol oynadığını vurğulayaraq tədbirin işinə uğurlar arzulayıb.

 

İki paneldən ibarət konfransda bir neçə tibb müəssisəsindən olan həkimlər məruzəçi kimi müxtəlif mövzularda çıxış ediblər.

 

Sonda tədbir iştirakçıları sertifikatla təltif olunublar.