Səhiyyə Nazirliyi Orqan Donorluğu və Transplantasiyası üzrə Koordinasiya Mərkəzi tərəfindən “Orqan bağışla həyat ver” adlı ilk maarifləndirmə aksiyası keçirilib.

 

Nazirlikdən Aztibb.az-a verilən məlumata görə, aksiyanın keçirilməsində əsas məqsəd insanların ölümündən sonra orqanlarının bağışlanması qaydalarını aşılamaq və bu sahədə məlumatlılığı artırmaq olub.

 

“Baku Crystal Hall”da keçirilən konsert zamanı, girişlərdə maarifləndirici stendlər quraşdırılıb. Həmçinin vətəndaşlara üzərində orqan donorluğu ilə bağlı məlumatlar əks olunan flayerlər, papaqlar və idman köynəkləri paylanılıb.

 

İnsanlara orqan donorluğu və transplantasiya haqqında ətraflı məlumat verilib, bu sahədə qanunvericiliyin tələbləri və prosedur qaydalar izah edilib. Qeyd olunub ki, insan ölümündən sonra orqanlarını bağışlamaqla 8-9 həyat xilas edə bilər.