Dilin əmmək, udmaq, çeynəmək, qidaları ağzı içərisində çevirmək, danışmaq kimi bir çox funksiyaları vardır. Bu funksiyaların hamısını yerinə yetirə bilməsi üçün dil ağız boşluğunda sərbəst hərəkət edə bilməlidir. Dilbağı deyilən dilin altındakı yumşaq toxuma, dilin ağız döşəməsinə yapışmasını təmin edir. Bəzən bu toxuma dilin hərəkətini məhdudlaşdıracaq qədər qısa və qalın ola bilər.

 

Bu barədə Aztibb.az-a Mingəçevir Şəhər Mərkəzi Xəstəxanasının uzman uşaq cərrahı Tehran Abbasov məlumat verib. Onun sözlərinə görə, hər il dünyada 10-12% uşaq ankyloglossia – dilbağının bərk və qısa olması ilə doğulur. Bu vəziyyət dilin aşağı, yuxarı və yanlara doğru hərəkət etməsinə mane olur. Nəticədə körpələr bir çox hallarda əmməkdə çətinlik yaşayırlar.

 

Uzman cərrah qeyd edib ki, bu uşaqlar bəzən böyüyəndə danışarkən hərfləri fərqli tələffüz edirlər. Dil pərdəsi çox qısa olan körpələrdə şübhəsiz uşaq cərrahının fikri nəzərə alınmalıdır. Lazım görülərsə, cərrahi müdaxilə-frenulektomiya ilə dilaltı pərdənin qısalığı aradan qaldırılmalıdır. Əməliyyat yüngül bir prosedurdur və narkozsuz icra olunur.