Diaqnoz Tibb Mərkəzinin həkim-dermatoveneroloqu Səidə Əmirova Azərbaycan Dermato-Kosmetoloqlarının I Milli Konfransında iştirak edib.

Mərkəzdən Aztibb.az-a bildirilib ki, AR Səhiyyə Nazirliyi və TƏBİB-in dəstəyi, “Azərbaycan Dermato-veneroloqlar Elmi Cəmiyyəti” ictimai birliyinin təşkilatçılığı ilə keçirilən konfrans Ümummlli Lider Heydər Əliyevin 100 illiyinə həsr olunub.

Tədbirin rəsmi açılış mərasimində "Azərbaycan Dermato-veneroloqlar Elmi Cəmiyyəti” ictimai birliyinin təsisçisi və konfransın sədri, Əməkdar elm xadimi, professor Zülfüqar Fərəcov və TƏBİB-in İcraçı direktorunun müavini Araz Nəsirov çıxış edərək konfransın işinə uğurlar arzulayıblar.

Konfransın elmi hissəsi “Dəri xəstəliklərinə müasir yanaşma”, “Kosmetologiyada müxtəlif korreksiya üsulları” mövzulu panel iclaslarla davam edib.

İclaslarda dinlənilən məruzələr iştirakçılar tərəfindən maraqla qarşılanıb və interaktiv müzakirələr panellərə rəng qatıb.