“Həkimlərimizi tanıyaq!” rubrikamızda saytımızın oxucularına travmatoloq-ortoped Cavid Musazadəni təqdim edirik.

 

O, 1982-ci ildə anadan olub. 1999-2005-ci illərdə Azərbaycan Tibb Universitetinin Müalicə-profilaktika fakültəsində təhsil alıb. 2005-2006-cı illərdə Bakı Şəhər Onkoloji Dispanserdə internatura, 2006-2008-ci illərdə Rusya Federasiyası Moskva şəhərində Sklifasovski adına Elmi-Tədqiqat Təcili Yardım Xəstəxanasında Travmatologiya və Ortopediya ixtisası üzrə ordinatura keçib.

 

Cavid Musazadə 2009-cu ildə Respublika Klinik Xəstəxanasında həkim travmatoloq-ortoped işləyib. 2011-ci ildə Türkiyyə Cümhuriyyəti Ankara şəhərində “Yıldırım Beyazit adına Eyitim və Araşdırma Hastanesin”də onurğa əməliyyatları, travmatoloji və ortopedik xəstəliklərin cərrahi müalicəsi üzrə uzun müddət kurs keçib. Mirqasımov adına Respublika Klinik Xəstəxnasında Travmatologiya və ortopediya şöbəsinin müdiri vəzifəsində çalışıb. Abşeron Rayon Mərkəzi Xəstəxanasında Neyrotravma şöbəsinin müdiri və travmatoloq-ortoped olaraq fəaliyyətini davam etdirib. Hal-hazırda Qobustan Rayon Mərkəzi Xəstəxanasının travmatoloq-ortopedi vəzifəsində çalışır.

Həkim 2011-ci ildə Türkiyədə 2019- cu ildə Almanya və Rusyada müxtəlif konfranslarda iştirak edib. Təkmilləşmə və bilik təcrübə mübadiləsi məqsədilə o, beynəlxalq və yerli konfrans və kurslarda iştirakını davam etdirir.

 

Qeyd edək ki, Cavid Musazadə II Qarabağ müharibəsi zamanı Mirqasımov adına Respublika Klinik Xəstəxanasının həkim briqadasının tərkibində ilk gündən son günə kimi Füzuli və Naftalan Rayon Mərkəzi Xəstəxanalarında yaralılara tibbi yardım göstərib və yüzdən çox cərrahi əməliyyat edib.