Qətərin İctimai Səhiyyə Nazirliyi (MoPH) və Hamad Medical Corporation-in (HMC) tərəfdaşlığı ilə Qətərin paytaxtı Doha şəhərində Beynəlxalq Sağlamlıq Konqresi keçirilib.

 

Mərkəzi Gömrük Hospitalından Aztibb.az-a bildirilib ki, Azərbaycan Respublikası Dövlət Gömrük KomitəsininTibbi Xidmət İdarəsinin rəis müavini Şahlar Mirqasım konfransda iştirak edib.

 

Dünyanın aparıcı tibb müəssisələrinin 2000-dən çox səhiyyə işçisi həm canlı, həm də onlayn olaraq Qətər 2023 Beynəlxalq Sağlamlıq Konqresinə qatılıb.

 

Üç gün davam edən beynəlxalq konfransda tibbin aktual məsələlərinə dair müxtəlif mövzularda seminarlar və təlim sessiyaları maraqla izlənilib.

 

Konfrans zamanı Qlobal səviyyədə Səhiyyədə Fövqəladə Hallara Hazırlıq və Cavab tədbirlərinin icmalı, Fövqəladə Hallar zamanı ölkələr arasında qarşılıqlı dəstəyin artırılması üçün Ümumdünya Səhiyyə Təşkilatının Təcilli Tibbi Yardım Qruplarının fəaliyyət prinsipinin öyrənilməsi, müasir səhiyyədə rəqəmsal innovativ texnologiyaların tətbiqi və s məsələlər ətrafında geniş təqdimatlar və müzakirələr aparılıb.

 

Eyni zamanda, daim dəyişən dünyada tibb işçilərinin müxtəlif maraq və təcrübə sahələrində ən son nailiyyətləri və yenilikləri, fəlakət və fövqəladə hallara hazırlıq təcrübələri barədə təqdimatlar edilib, iqlim dəyişikliyi və psixi sağlamlıq kimi problemlərin həlli yollarının axtarışı kimi aktual məsələlər barədə fikir mübadilələri aparılıb.

 

Qeyd edək ki, konfransda əhalinin sağlamlığının qorunmasında, yüksək keyfiyyətli tibbi xidmətdə ən son yanaşmalar, prosedurlar, cihazlar və avadanlıqlar, müalicə üsulları haqqında son araşdırmaları nümayiş etdirən 100-dən çox poster təqdim edilib.