ABŞ-ın əczaçılıq şirkəti Pfizer, koronavirus (COVID-19) peyvəndi ilə bağlı müqaviləni pozduğuna görə Polşaya qarşı 1,5 milyard dollarlıq iddia qaldırıb.

Aztibb.az-ın medimagazin.com.tr-yə istinadla məlumatına görə, Polşa Pfizer ilə 60 milyon doza COVID-19 peyvəndi alqı-satqı müqaviləsi imzalasa da, peyvəndləri almayaraq ödəniş etməyib.

Bu səbəbdən Pfizer sözügedən müqaviləni pozduğu üçün Brüsseldə açdığı iddia çərçivəsində Polşadan 1,5 milyard dollar tələb edib.

İş üzrə ilk məhkəmə iclasının dekabrın 6-da keçiriləcəyi gözlənilir.

Polşanın Səhiyyə Naziri Adam Niedzielski aprelin 19-da Avropa Komissiyasına və Pfizerə daha COVID-19 peyvəndi alınmayacağı və ödəniş edilməyəcəyi barədə məlumat verildiyini açıqlamışdı.

Niedzielski açıqlamasında, "Polşada anbarlarda 67-70 milyon doza peyvənd var. Bütün bunlarla nə edəcəyik?", - deyə bildirmişdi.