Mərkəzi Gömrük Hospitalından Aztibb.az-a verilən xəbərə görə, 3 gün davam edən “Minimal və endo-vizual ginekologiya” və “Sərhədsiz ginekologiya – VII konfrans” beynəlxalq elmi-praktik konfransda Dövlət Gömrük Komitəsi Tibbi Xidmət İdarəsinin rəis müavini, t.ü.f.d., dos.İsmayıl Əfəndiyev, Tibbi Xidmət İdarəsinin Elmi-Təcrübi və Tədris Mərkəzinin rəisi, t.e.d. Rəşad Mahmudov və Mərkəzi Gömrük Hospitalının mama-ginokoloqu Sədi Allahverdiyev iştirak ediblər.

 

Rəşad Mahmudov tədbirin rəsmi açılış hissəsində çıxış edib. Mərkəzi Gömrük Hospitalının mama-ginokoloqu Sədi Allahverdiyev konfransda "PAS spektrumla hamilələrin aparılması - Azərbaycan həmkarlarımızın təcrübəsi" mövzusunda məruzəsini təqdim edib.

 

Təqdimat tədbir iştirakçıları tərəfindən maraqla qarşılanıb və suallar cavablandırılıb.

 

Konfransın birinci günündə canlı cərrahiyyə ilə başlanan “MİPS BAKI - III Praktik Kurs”unda laparoskopik sakropeksiya əməliyyatı birbaşa akt zalına canlı bağlantı ilə həyata keçirilib. Tədbir zamanı kurslarda mütəxəssislər ginekoloji xəstəliklər zamanı müasir müalicə üsullarını əhatə edən müxtəlif mövzular barədə çıxışlar ediblər.

 

Qeyd edək ki, yerli və xarici professorların, yüksəkixtisaslı mütəxəssislərin iştirak etdiyi beynəlxalq konfrans və MİPS kursları Azərbaycan Respublikası Səhiyyə Nazirliyinin “Davamlı Tibbi Təhsil üzrə elm və tədris tədbirlərinin akkreditasiya Qaydaları“ əsasında akkreditasiya olunaraq 27 DTT balı ilə qiymətləndirilib.