Klinikadan Aztibb.az-a verilən xəbərə görə, tədbirdə tibb müəssisəsinin direktoru Barat Yusubov müxtəlif istiqamətdə görülən işlər və gələcək planlar barədə məlumat verib.

 

Direktor son 3 ay ərzində klinikada Cərrahiyyə və Transplantasiya, Ürək-damar, Reproduktiv Sağlamlıq və Ailə Planlaması mərkəzlərinin, həmçinin bir sıra şöbə və bölmələrin yaradıldığını diqqətə çatdıraraq, yaxın gələcəkdə daha bir neçə mərkəzin fəaliyyətə başlayacağını qeyd edib.

 

O, transplantasiya, göz cərrahiyyəsi, fizioterapiya və reablitasiya, evdə xidmət, qan bankı şöbələri, STROK mərkəzi və onlayn növbənin əldə olunması istiqamətində də işlərin davam etdiyini bildirib.

 

Barat Yusubov icbari tibbi sığortanın Xidmətlər Zərfi daxilində müraciət edən pasiyentlərin sayının ötən ay ərzində 23 mini keçdiyini qeyd edərək, ambulator xidmət sayının isə 100 mini ötdüyünü və növbəti aylarda bu sayın artırılmasının klinikanın əsas hədəflərindən biri olduğunu diqqətə çatdırıb.

 

Yeni Klinikanın qarşısında duran əsas hədəflərdən HİMSS 6-cı dərəcə və İSO sertifikatlarının əldə olunmasının olduqca önəmli olduğunu vurğulayan Barat Yusubov bu istiqamətdə görülən işlərin gələn ilin ilk rübündə yekunlaşması üçün zəruri tədbirlərin görüldüyünü bildirib.

 

Tədbirdə əmək funksiyalarını yüksək peşəkarlıqla yerinə yetirdiklərinə görə Ümumi şöbə və İctimaiyyətlə əlaqələr şöbəsi təltif edilib.