Mərkəzi Gömrük Hospitalından Aztibb.az-a bildirilib ki, Hospitalda Bakı SOS Uşaq kəndinin nümayəndələri ilə görüş keçirilib.

 

Görüşdə Dövlət Gömrük Komitəsinin Tibbi Xidmət İdarəsinin rəis müavini, t.ü.f.d., dos.İsmayıl Əfəndiyev, Mərkəzi Gömrük Hospitalının rəisi - baş həkimi Bəxtiyar Musayev, rəis müavini Nabil Seyidov, otorinolarinqoloq Elvin Əzizov, Bakı SOS Uşaq kəndinin direktoru Fuad Ələkbərov, həkim Anjela Əliyeva, Tibbi Xidmət İdarəsinin Elmi Təcrübi Tədris Mərkəzinin mütəxəssisi Şəhla Mirzəzadə və digər nümayəndələr iştirak ediblər.

 

Tədbirdə Mərkəzi Gömrük Hospitalının rəisi - baş həkimi Bəxtiyar Musayev çıxış edərək bildirib ki, Azərbaycan Respublikası Dövlət Gömrük Komitəsinin Tibbi Xidmət İdarəsinin Mərkəzi Hospitalı və SOS Uşaq Kəndləri Azərbaycan Assosiasiyası arasında cari ildə imzalanan əməkdaşlıq memorandumu çərçivəsində Mərkəzi Gömrük Hospitalının Bakı SOS Uşaq kəndində keçirdiyi növbəti aksiya zamanı səhhətlərində problem aşkarlanan iki uşaq otolorinqoloq Elvin Əzizov tərəfindən uğurla əməliyyat olunub. Dr.Bəxtiyar Musayev qeyd edib ki, bu cür aksiyalar davamlı olaraq həyata keçiriləcək və uşaqların sağlamlığı diqqət mərkəzində olacaq.

 

SOS Uşaq Kəndəlinin Bakı filialının direktoru Fuad Ələkbərov “SOS Uşaq Kəndləri-Azərbaycan" Assosiasiyasının adından Dövlət Gömrük Komitəsinin sədri, gömrük xidməti general-leytenantı Şahin Bağırova, Dövlət Gömrük Komitəsi Tibbi Xidmət İdarəsinin rəisi, Əməkdar həkim Ceyhun Məmmədova və uşaqlara tibbi xidmət göstərən personala minnətdarlığını bildirib.

 

Tədbirin sonunda Fuad Ələkbərov “SOS Uşaq Kəndləri-Azərbaycan" Assosiasiyasının adından Mərkəzi Gömrük Hospitalına təşəkkürnamə təqdim edib.