Əmək və Əhalinin Sosial Müdafiəsi Nazirliyin tabeliyindəki Dövlət Tibbi-Sosial Ekspertiza və Reabilitasiya Agentliyi tərəfindən bu ilin 10 ayında əlilliyi olan şəxslərə ötən ilin müvafiq dövrünə nisbətən 46 faiz çox olmaqla 71,2 min reabilitasiya vasitəsi verilib.

Bu barədə Aztibb.az Agentliyin feysbuk səhifəsinə istinadla xəbər verir.

Onlardan 317-i təkərli oturacaq (o cümlədən 310-u mühərrikli təkərli oturacaq), 2031-i aşağı və yuxarı ətraf, habelə 364-ü döş protezi, 1319-u eşitmə aparatı, 2363-ü qoltuqaltı və dirsəkaltı ağac olub.  Həmçinin əlilliyi olan şəxslərə 2436 cüt protez ayaqqabı, 5842 yarım cüt ortopedik ayaqqabı 146 korset və s. reabilitasiya vasitələri təqdim olunub.

Yanvar-oktyabr aylarında ümumilikdə 9 min nəfər əlilliyi olan şəxs reabilitasiya vasitəsi ilə təmin edilib.

Tarixi Zəfərimizlə yekunlaşan 44 günlük Vətən müharibəsindən sonra sosial dəstək proqramı çərçivəsində müharibə ilə əlaqədar əlilliyi olan 2035 şəxsə 46 min reabilitasiya vasitəsi verilib, həmçinin müharibə ilə əlaqədar əlilliyi olan 448 şəxs 467 ədəd yüksək texnologiyalı müasir protezlə təmin olunub.