Mərkəzi Klinikada ölkəmizdə səfərdə olan Türkiyə Cümhuriyyəti Ankara Universitetinin rektoru, professor Necdet Ünüvarın rəhbərlik etdiyi nümayəndə heyəti ilə görüş keçirilib.
Mərkəzi Klinikadan Aztibb.az-a verilən xəbərə görə, görüşdə baş direktor müavini Ceyhun Topçubaşov, baş həkim, professor Kamran Musayev, Ankara Universitetinin məzunu və hazırda Mərkəzi Klinikanın Uşaq reanimasiyası bölməsinə rəhbərlik edən Anar Qurbanov, eləcə də bəzi şöbə və bölmələrin rəhbər şəxsləri iştirak ediblər.
Prof. Kamran Musayev qonaqlara Mərkəzi Klinika haqqında ətraflı məlumat verib. O, bu cür nüfuzlu nümayəndə heyətinin klinikaya səfərindən xüsusi məmnuniyyət hissi duyduğunu bildirib.
Görüşdə Ankara Universiteti ilə elmi və personal mübadiləsi sahəsində mövcud əməkdaşlıq əlaqələrinin daha da inkişaf etdirilməsi istiqamətində müzakirələr aparılıb.
