Uzman həkimlər - Leyla Mercan Sabunçu Tibb Mərkəzində anestezioloq-reanimatoloq, Sait Mercan isə neyrocərrah kimi fəaliyyətə başlayıblar.
Bu barədə Aztibb.az-a TƏBİB-dən məlumat verilib.
Bildirilib ki, Leyla Mercan 2000-2006-cı illərdə Azərbaycan Tibb Universitetinin Müalicə-profilaktika fakültəsində təhsil alıb. 2007-2016-cı illərdə həkim-terapevt olaraq Bakıda özəl tibb müəssisəsində çalışıb.
O, 2016-cı ildə Türkiyədə uzmanlıq təhsili almağa başlayıb. 2017-2022-ci illər ərzində Ankaradakı Hacettepe Universitetində anestezioloq-reanimatoloq üzrə assistant vəzifəsində fəaliyyət göstərib. 2022-ci ildə uzman anestezioloq-reanimatoloq adını qazanıb.
Leyla Mercan 2020-ci ildə assistanlığı donduraraq Ümumdünya Səhiyyə Təşkilatının (ÜST) "REACT C-19" layihəsinin həkimi seçilib, Azərbaycanın müxtəlif xəstəxanalarında “COVID-19” üzrə reanimasiya şöbələrində çalışıb. Daha sonra 44 günlük Vətən müharibəsi dövründə könüllü həkim kimi fəaliyyət göstərib.
Uzman həkim Sait Mercan isə 2000-2007-ci illərdə İran Tibb Universitetində təhsil alıb. O, 2007-2014-cü illərdə təcili tibbi yardım həkimi olaraq çalışıb.
2015-ci ildə Türkiyədə uzmanlıq təhsilinə başlayıb. 2015-2020-ci illərdə Ankaradakı Hacettepe Universitetində beyin və sinir cərrahiyyəsi üzrə assistant kimi fəaliyyət göstərib.
O, 2020-ci ildə uzman həkim-neyrocərrah adını qazanıb. 2020-2021-ci illərdə Ankarada, 2021-2023-cü illərdə Vanda həkim kimi çalışıb.
Qeyd edək ki, uzman həkimlər İcbari Tibbi Sığorta üzrə Dövlət Agentliyi tərəfindən icra olunan “Tibb müəssisələrində ixtisaslı kadr çatışmazlığının aradan qaldırılmasına dair 2022-2023-cü illər üçün Proqram” çərçivəsində fəaliyyətə başlayıblar.
