Mərkəzi Gömrük Hospitalının rəisi -baş həkimi, tibb xidməti polkovnik-leytenantı Bəxtiyar Musayev Almaniya Federativ Respublikasının Düsseldorf şəhərində keçirilən “MEDİCA 2023” Beynəlxalq Tibbi Sərgisində iştirak edib.

Hospitaldan Aztibb.az-a verilən məlumata görə, Bəxtiyar Musayev sərgidə iştirak edən dünyanın bir çox aparıcı tibbi avadanlıq və ləvazimatların istehsalı ilə məşğul olan şirkətlərin nümayəndələri ilə görüşüb, son yeniliklərlə tanış olub, geniş fikir mübadiləsi aparıb.

Sərgidə müxtəlif ölkələrin tibb və səhiyyə sahəsində çalışan istehsalçıları, distribütorları və peşəkarları bir araya gəliblər. Burada tibbi avadanlıqlar, tibbi məhsullar, innovativ laboratoriya avadanlıqları, optika, stomatologiya, tibbdə informasiya texnologiyaları və s. təqdim olunub.

Qeyd edək ki, MEDİCA Beynəlxalq Tibbi Sərgisinin yarım-əsrlik tarixi var və təşkil olunduğu vaxtdan bu günədək dünyanın bir çox şirkətləri, dövlət qurumları arasında əməkdaşlığın qurulması və inkişaf etdirilməsi üçün əhəmiyyətli beynəlxalq platformaya çevirilib.