Abşeron Rayon Mərkəzi Xəstəxanasında qızılca xəstəliyi ilə bağlı tədbir keçirilib.

Xəstəxanadan Aztibb.az-a bildirilib ki, tədbirdə Abşeron Gigiyena və Epidemiologiya Mərkəzinin rəhbəri Müslümə Cəfərova, ailə sağlamlıq mərkəzlərinin rəhbərləri, pediatrlar, terapevtlər, infeksionistlər və allerqoloqlar iştirak ediblər.

Tədbir zamanı xəstəxananın həkim-infeksionisti Əminə İsmixanova məruzəçi qismində çıxış edərək bildirib ki, qızılca virus mənşəli xəstəlik olduğundan hər hansı bir spesifik müalicəsi yoxdur:

“Xəstəlik insandan insana hava-damcı yolu ilə keçir və yüksək yoluxduruculuq qabilliyyətinə malikdir. Körpələri, eləcə də peyvənd olunmayan şəxslərin immunizasiyasını tövsiyə edirəm. Xüsusilə qızılca ilə təmas olubsa ilk 72 saat ərzində peyvəndin vurulması vacibdir”.

Daha sonra Abşeron Gigiyena və Epidemiologiya Mərkəzinin rəhbəri Müslümə Cəfərova çıxış edərək vacib məqamlara toxunub:

“Qızılca əhaliyə bəsit xəstəlik kimi görünsə də onun ciddi fəsadlarla nəticələnə biləcək ağırlaşmaları olur. Əgər övladınızda və ya özünüzdə hər-hansı kataral əlamət və ya səpki müşahidə olunursa, mütləq şəkildə həkimlə əlaqə saxlamaq lazımdır. Unutmayaq ki, hər hansı düzgün olmayan müdaxilə sağlamlığınıza ciddi şəkildə zərbə vura bilər”.

Tədbirin sonunda mövzu ilə bağlı müzakirələr aparılıb.