Bu gün Naxçıvan Perinatal Mərkəzdə Beynəlxalq Vaxtından Əvvəl Doğulan Uşaqlar Günü münasibətilə tədbir keçirilib.

Naxçıvan MR Səhiyyə Nazirliyindən Aztibb.az-a verilən məlumata görə, Perinatal Mərkəzin direktoru Ülkər Bayramova açaraq bildirib ki, sağlam həyatın təməli sağlam hamiləlikdən sonra vaxtında və sağlam doğuşla başlayır. Lakin dünyada və ölkəmizdə bir çox körpələr vaxtından əvvəl, hamiləlik prosesi başa çatmamış doğulur.

Diqqətə çatdırılıb ki, normal hamiləliyin orta müddəti 40 həftədir. Körpə 37 həftədən əvvəl doğulubsa, bu, vaxtından əvvəl doğulmuş körpə sayılır. Doğuş nə qədər tez olarsa, sağlamlıq riskləri bir o qədər çox olar. Bu səbəblərə görə də prenatal baxımın keyfiyyəti və kəmiyyəti böyük əhəmiyyət kəsb edir.

Qeyd olunub ki, Naxçıvan Perinatal Mərkəzdə erkən doğulan uşaqlara hərtərəfli tibbi xidmət göstərilməsi üçün lazımi şərait yaradılıb və yenidoğulmuşlar yüksək qayğı ilə təmin olunublar.

Tədbirdə Naxçıvan Muxtar Respublikası Ailə Qadın və Uşaq Problemləri üzrə Dövlət Komitəsinin sədr müavini Aytən Məmmədova “Naxçıvan Muxtar Respublikasında uşaqlara göstərilən dövlət qayğısı”, Dicle Universiteti Uşaq Sağlığı və Xəstəlikləri bölümünün professoru, həkim-pediatr İlyas Yolbaş “Dünya təcrübəsində erkən doğulan uşaqlara yanaşma metodları”, pediatr Hafizə Rzayeva “Naxçıvan Perinatal Mərkəzdə erkən doğulan uşaqlara tibbi xidmət və qayğı”, ginekoloq Nəzakət Gülməmmədova “Erkən doğuşların səbəbləri” mövzusunda çıxışlar ediblər.

Sonda vaxtından əvvəl doğulmuşlara qarşı həssaslığı və imtiyazı təmsil edən bənövşəyi rəngin və uşaq corablarının Beynəlxalq Vaxtından Əvvəl Doğulan Uşaqlar Gününün simvolu olduğu qeyd edilib və bənövşəyi rəngli şarlar havaya buraxılıb.