Tanınmış türk aktyoru, rejissor, ssenarist, yazıçı və həkim Ercan Kesalın Azərbaycan Tibb Universitetinin (ATU) tələbələri ilə görüşü baş tutub.

Universitetdən Aztibb.az-a verilən məlumata görə, görüş zamanı tanınmış aktyor-həkim özü barədə tələbələrə ətraflı məlumat verib. O, həkimlik sənətinin müqəddəs və bənzərsiz bir sənət olduğunu qeyd edib. Bunu həkimlərin xəstələrə şəfa verməsi və yenidən həyata qaytarması ilə izah edib: “Siz əgər xəstələrə şəfqət və həssaslıqla yanaşsanız, onlar ən yaxınlarına demədikləri ürək sözlərini sizə deyə, sirlərini belə sizinlə bölüşə bilər. Siz təkcə onlara şəfqət verən bir həkim yox, həm də sirr yoldaşı, sirdaşı olacaqsınız. Xəstələr sizdə ilk olaraq bir şəfqət hiss etməli, sizə inanmalıdır ki, etdiyiniz müalicə öz nəticəsini göstərsin. Yoxsa edilən müalicə heç bir nəticə verməyə bilər”.

Ercan Kesal 1984-cü ildə Ege Universitetinin Tibb fakültəsinin məzunu olduğunu, bir müddət Ankara, Kesin, Bala və bir çox qəsəbələrdə tibb ocaqlarında çalışdığını, sərbəst həkimlik peşəsi ilə məşğul olan zaman isə “tətbiqi psixologiya və sosial antropologiya” ixtisası üzrə təhsil aldığını söyləyib.

Qeyd edib ki, aktyorluq sənətini qəbul etməsində həyat yoldaşı Nazan Kesalın müstəsna rolu olub: “Mən ədəbiyyatı, poeziyanı sevməklə yanaşı, aktyorluğu da çox sevirdim. Görünür, məndə aktyorluq qabiliyyətin olduğunu həyat yoldaşım Nazan xanım hiss edə bilibmiş. Ona görə də məni 2002-ci ildə Nuri Bilge Ceylanla tanış etdi. O, mənə “Uzaq” filmində epizodik bir rol təklif etdi. Oynadım və bununla da mənim aktyorluq karyeram başladı. Sonra onun çəkdiyi “Üç Meymun” filminə dəvət aldım. Filmdə Sərvət rolunu uğurla ifa etdim”.

Ercan Kesal Türkiyənin tanınmış şair və yazarlarının daim onların qonaqları olduğunu, şer məclislərinin qurulduğunu, şairlərin yazdığı şeirləri və etdikləri söhbətləri maraqla dinlədiyini də tələbələrin diqqətinə çatdırıb. Düşdüyü mühitin onun poeziyaya, ədəbiyyata marağının artmasına təsirsiz ötüşmədiyini bildirib.

Tanınmış həkim-aktyor tələbələri maraqlandıran sualları da cavablandırıb.

Sonda o, nəşr etdirdiyi kitabları tələbələrə hədiyyə edib.

Onun yazdığı kitablar -  “Əvvəl zaman”, “Öz işığında yanan adam”, “Həkimlik sənətləri”, “Əslində...”, “Nəsibsiz adayız” və s. nəşrlər Tibb Universitetinin tələbələri tərəfindən böyük həvəslə qəbul edilib.