Səhiyyə Nazirliyi Elmi-Tədqiqat Mamalıq və Ginekologiya İnstitutunda hamiləliyin 31-ci həftəsində dünyaya gələn körpə sağlam şəkildə evə yola salınıb.

Bu barədə Aztibb.az-a İnstitutdan xəbər verilib.

31 həftəlik hamilə olan qadın ağrılar və uşaqlıq üzərindəki çapığın yararsızlığı şikayəti ilə İnstitutun Qəbul şöbəsinə yaxınlaşıb. Həkim mama-ginekoloq Cahan İslamova tərəfindən konsultasiya olunduqdan sonra dölün respirator distres sindromunun qarşısını almaq üçün tədbirlər görülüb. Sonra vəziyyəti ilə əlaqədar dərhal qeysəriyyə kəsiyi icra olunub və əməliyyat fəsadsız keçib.

Vaxtından əvvəl dünyaya gələn azçəkili körpə Yenidoğulmuşların reanimasiya və intensiv terapiyası şöbəsinə köçürülüb. Həkim-neonatoloq Günel Xəlilovanın və tibbi heyətin nəzarətində olan körpəyə daimi olaraq Təranə Kərimova tərəfindən ultrasəs müayinə icra olunaraq vəziyyəti nəzarətdə saxlanılıb. 20 günlük stasionar müalicədən sonra, körpə sağlam şəkildə ailəsinə təhvil verilib.